ឯកឧត្តម ប្រាក់ ចំរើន អញ្ជើញជួបសំណេះសំណាល និងនាំយកអំណោយជូនប្រជាពលរដ្ឋ និងក្រុមប្រឹក្សាឃុំ ដំណាក់អំពិល ស្រុកអង្គស្នួល ខេត្តកណ្តាល
ថ្ងៃទី 2 ខែកក្កដា ឆ្នាំ2025
នាថ្ងៃទី២៥ ខែមិថុនា ឆ្នាំ២០១១ ឯកឧត្តម ប្រាក់ ចំរើន សមាជិកព្រឹទ្ធសភា បានអញ្ជើញចុះជួប សំណេះសំណាលជាមួយនឹងក្រុមប្រឹក្សាឃុំ និងប្រជាពលរដ្ឋ ព្រមទាំងនាំយកអំណោយ រួមមានធុងបាស់០១ឈុត មេក្រូ ០១គ្រឿង និងម៉ាស៊ីនភ្លើង០១គ្រឿង ជូនភូមិដំណាក់អំពិល ភូមិទម្លាប់ខ្ពស់ត្បូង និងភូមិព្រៃសំរោង ឃុំដំណាក់អំពិល ស្រុកអង្គស្នួល ខេត្តកណ្តាល ។
លោកស្រី ស៊ុំ កល្យាណ ប្រធានក្រុមប្រឹក្សាឃុំដំណាក់អំពិល បានមានប្រសាសន៍ថ្លែងអំណរគុណ យ៉ាងជ្រាលជ្រៅចំពោះឯកឧត្តម ប្រាក់ ចំរើន សមាជិកព្រឹទ្ធសភា ដែលជានិច្ចកាលតែងតែយកចិត្តទុកដាក់ជួយឧបត្ថម្ភគាំទ្រទាំងសម្ភារៈ ថវិកា ដល់បងប្អូនប្រជាពលរដ្ឋឃុំដំណាក់អំពិល។
ជាមួយគ្នានោះដែរ លោកស្រីបានថ្លែងអំណរគុណដល់បងប្អូនប្រជាពលរដ្ឋក្នុងដំណាក់អំពិលទាំងអស់ដែលបានអញ្ជើញទៅបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីថ្ងៃទី០៣ ខែមិថុនាឆ្នាំ២០១២កន្លងទៅនេះ។ លោកស្រីបានបន្តថា ដើម្បីជាការតបស្នងដល់បងប្អូនប្រជាពលរដ្ឋឃុំដំណាក់អំពិល ក្នុងនាមលោកស្រីជាមេឃុំនឹងខិតខំបំពេញភារកិច្ចឲ្យអស់ពីសមត្ថភាពដោះស្រាយរាល់ការលំបាក និងសំណូមពររបស់ប្រជាពលរដ្ឋឲ្យបានល្អប្រសើរ ដើម្បីធ្វើយ៉ាងណាឲ្យឃុំដំណាក់អំពិលមានការអភិវឌ្ឍលើគ្រប់វិស័យ។
ឯកឧត្តម ប្រាក់ ចំរើន សមាជិកព្រឹទ្ធសភា មានប្រសាសន៍សណេះសំណាលសាកសួរសុខទុក្ខដល់ក្រុមប្រឹក្សាឃុំ និងប្រជាពលរដ្ឋទាំងបីភូមិនាឳកាសនោះថា សមាជិកក្រុមប្រឹក្សាឃុំទាំងអស់ ត្រូវមានសាមគ្គីភាពផ្ទៃក្នុង ខិតខំអនុវត្តតួនាទី ភារកិច្ចរបស់ខ្លួន ធ្វើជាគំរូល្អ និងធ្វើអំពើល្អដោយយកចិត្តទុកដាក់ក្នុងការអនុវត្តការងារនៅតាមមូលដ្ឋានរបស់ខ្លួនឲ្យបានល្អប្រសើរ ជាពិសេសការអនុវត្តគោលនយោបាយភូមិ ឃុំមានសុវត្ថិភាព។
នាក្នុងឳកាសនោះដែរឯកឧត្តម ប្រាក់ ចំរើន បានពាំនាំនូវប្រសាសន៍ផ្តាំផ្ញើនូវការសាកសួរសុខទុក្ខពីសំណាក់សម្តេចទាំងបី ដែលមានសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាលសម្តេចទាំងបីតែងតែយកចិត្តទុកដាក់អំពីសុខទុក្ខរបស់បងប្អូនប្រជាពលរដ្ឋ ក៏ដូចជាប្រជាពលរដ្ឋនៅឃុំដំណាក់អំពិលទាំងមូល។
ឯកឧត្តម ប្រាក់ ចំរើន បាននាំយកអំណោយ សម្ភារៈ និងថវិកាមួយចំនួនផ្តល់ជូនភូមិដំណាក់អំពិល ភូមិទម្លាប់ខ្ពស់ត្បូង និងភូមិព្រែសំរោង ក្នុងឃុំដំណាក់អំពិល ដែលក្នុងភូមិនីមួយៗទទួលបានធុងបាស់០១ឈុត មេក្រូ០១គ្រឿង ម៉ាស៊ីនភ្លើង០១គ្រឿង និងថវិកា៣០ម៉ឺនរៀល៕
អត្ថបទពាក់ព័ន្ធ
