នាព្រឹកថ្ងៃទី០១ ខែមករា ឆ្នាំ២០២៣ ឯកឧត្តម ម៉ម ប៊ុននាង ប្រធានគណៈកម្មការទី១០ និងជាអ្នកនាំពាក្យព្រឹទ្ធសភា បានអញ្ជើញចុះជួបសំណេះសំណាល សួរសុខទុក្ខ និងនាំយកអំណោយដ៏ថ្លៃថ្លារបស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងលោកជំទាវ ចែកជូនដល់ក្រុមប្រឹក្សាឃុំ និងបងប្អូនប្រជាពលរដ្ឋក្នុងឃុំត្រពាំងវែង សរុបចំនួន៣០៣នាក់ ស្ថិតនៅសាលាឃុំត្រពាំងវែង ស្រុកកណ្តាលស្ទឹង ខេត្តកណ្តាល។ ក្នុងឱកាសនោះ ឯកឧត្តម ម៉ម ប៊ុននាង បានពាំនាំនូវការផ្តាំផ្ញើនូវការសាក់សួរសុខទុក្ខ និងសេចក្តីនឹករលឹកពីសំណាក់សម្តេចប្រធានព្រឹទ្ធសភា និងលោកជំទាវ ព្រមទាំងថ្នាក់ដឹកនាំសមាជិក សមាជិកាព្រឹទ្ធសភា ជូនដល់អាជ្ញាធរមូលដ្ឋាន និងប្រជាពលរដ្ឋទាំងអស់។ ជាមួយគ្នានេះ ឯកឧត្តម បានអំពាវនាវដល់អាជ្ញាធរមូលដ្ឋាន និងប្រជាពលរដ្ឋឱ្យបន្តរួមសាមគ្គីភាព ចូលរួមថែរក្សាសុខសុវត្ថិភាព សន្តិភាព ការពាររាល់សមិទ្ធផលនៃសង្គមជាតិ និងបន្តកសាងភូមិ ឃុំរបស់យើង ឱ្យកាន់តែរីកចម្រើនស្រស់បំព្រងឡើងថែមទៀត។ អំណោយដែលនាំយកទៅចែកជូនដល់អាជ្ញាធរ និងបងប្អូនប្រជាពលរដ្ឋទាំង៣០៣នាក់ក្នុងឱកាសនោះរួមមាន៖ អាវកីឡាចំនួន១៧កេស ស្មើ៤០៨អាវ ខោកីឡា១១កេស ស្មើ៣០៨ខោ សេរ៉ូមលាបមុខ១៨កេស ស្មើ១០៨ប្រអប់ ម៉ាស់បិទមុខ១៤កេស ស្មើ៤៤៨ប្រអប់ ម្សៅទ្រនាប់លាបមុខ៤កេស ស្មើ១៧៦ប្រអប់ និងសារុងចំនួន១៤៥ ព្រមទាំងម្នាក់ៗថវិកា២ម៉ឺនរៀល។ ក្រៅពីនេះ ឯកឧត្តម ម៉ម ប៊ុននាង ក៏បានចូលរួមរំលែកទុក្ខ និងចូលបច្ច័យបុណ្យសពប្រជាពលរដ្ឋចំនួន០៧គ្រួសារ ក្នុងមួយគ្រួសារថវិកា២០ម៉ឺនរៀល ដោយចំណាយអស់ថវិកាសរុបចំនួន ៨,៥៨៥,០០០រៀល។ សូមបញ្ជាក់ថា៖ អំណោយរបស់សម្តេចប្រធានព្រឹទ្ធសភា និងលោកជំទាវ ដែលចែកជូនដល់អាជ្ញាធរ និងបងប្អូនប្រជាពលរដ្ឋ គឺទទួលបានការរួមចំណែកដ៏ធំធេង ពីសំណាក់មូលនិធិចែករំលែកសង្គ្រោះជីវិតសកល នៃសាធារណៈរដ្ឋកូរ៉េ ជូនព្រឹទ្ធសភានៃព្រះរាជាណាចក្រកម្ពុជា៕
ប្រភព៖ នាយកដ្ឋានព័ត៌មាន
