នាព្រឹកថ្ងៃទី១៨ ខែមករា ឆ្នាំ២០១៩ ឯកឧត្តម យ៉ង់ សែម ប្រធានក្រុមសមាជិកព្រឹទ្ធសភាប្រចាំភូមិភាគទី៨និងជាប្រធានគណៈកម្មការទី១ព្រឹទ្ធសភា បានអញ្ជើញធ្វើមតិបូកសរុប និងបិទអង្គវេទិកាថ្នាក់ខេត្តស្តីពី «ការពង្រឹងសមត្ថភាពរបស់ក្រុមប្រឹក្សាឃុំ សង្កាត់ និងការផ្តល់ សេវាសាធារណៈនៅមូលដ្ឋាន»នៅសាលប្រជុំសាលា ខេត្តកំពង់ធំ។ ឯកឧត្តម យ៉ង់ សែម ប្រធានក្រុមសមាជិកព្រឹទ្ធសភាប្រចាំភូមិភាគទី៨ និងជាប្រធានគណៈកម្មការទី១ព្រឹទ្ធសភាបានមានប្រសាសន៍វាយតម្លៃខ្ពស់ចំពោះលទ្ធផលរបស់អង្គវេទិកាដែលបានឆ្លុះបញ្ចាំងពីការយកចិត្តទុកដាក់របស់សមាជិក សមាជិកាក្រុមប្រឹក្សាក្រុង ស្រុក ខណ្ឌ ឃុំសង្កាត់ដែលបានចូលរួមយ៉ាងសកម្មដោយមិនខ្លាចនឿយហត់ ដើម្បីរួមគ្នាចែករំលែកព័ត៌មាន មតិយោបល់ និងបទពិសោធន៍ល្អៗ និងមានតម្លៃជាគុណប្រយោជន៍បង្កើនសមត្ថភាពដល់ក្រុមប្រឹក្សា សង្កាត់ ដែលជាមូលដ្ឋានគ្រឹះក្នុងការផ្តល់សេវាសាធារណៈជូនប្រជាពលរដ្ឋ និងអភិវឌ្ឍន៍មូលដ្ឋានឱ្យបានកាន់តែល្អប្រសើរឡើងផងដែរ។ជាមួយគ្នានេះដែរ ការរៀបចំអង្គវេទិការនាពេលនេះគឺមានអត្ថន័យយ៉ាងជ្រាលជ្រៅ មិនត្រឹមតែសម្រាប់ព្រឹទ្ធសភាថ្នាក់ជាតិ និងថ្នាក់ក្រោមជាតិប៉ុណ្ណោះទេ ប៉ុន្តែវេទិកានេះក៏បានឆ្លុះបញ្ចាំងផងដែរអំពីការយកចិត្តទុកលើការលើកស្ទួយការអនុវត្តគោលនយោបាយវិមជ្ឈការ និងវិសហមជ្ឈការពីសំណាក់ស្ថាប័នពាក់ព័ន្ធនានាផងដែរ។វេទិកាថ្នាក់ខេត្តនេះ ប្រព្រឹត្តទៅរយៈពីរថ្ងៃគឺចាប់ពីថ្ងៃទី១៧–១៨ ខែមករា ឆ្នាំ២០១៩ ក្រោមកិច្ចសហការរៀបចំរវាងក្រុមសមាជិកព្រឹទ្ធសភាប្រចាំភូមិភាគទី៨ និងរដ្ឋបាលខេត្តកំពង់ធំ។
