កាលពីថ្ងៃទី១៩​  ខែកុម្ភៈ  ឆ្នាំ២០១៣ នៅសាលប្រជុំសាលាខេត្តព្រះសីហនុ  គណៈប្រតិភូ   គណៈកម្មការសិទ្ធិមនុស្ស ទទួលពាក្យបណ្តឹង និងអង្កេត ហៅកាត់គណៈកម្មការទី១ព្រឹទ្ធសភា ដឹកនាំដោយ ឯកឧត្តម​  យ៉ង់ សែម ប្រធានគណៈកម្មការ អមដំណើរដោយ​ឯកឧត្តម គឹម ណាំង  អនុប្រធាន និងឯកឧត្តម  អ៊ុក គង់ លេខាធិការ បានអញ្ជើញជួបសវនាការការងារ ជាមួយនឹងអាជ្ញាធរខេត្ត ចៅក្រម ព្រះរាជអាជ្ញាអមសាលាដំបូងខេត្ត ស្នងការប៉ូលីស មេបញ្ជាការរងកងរាជអាវុធហត្ថ មេ បញ្ជាការប្រតិបត្តិការសឹក  និងមន្ទីរពាក់ព័ន្ធនានា ដែលដឹកនាំដោយឯកឧត្តម  ចីវ    គឹមហេង អភិបាលរងខេត្តព្រះសីហនុ ដើម្បីសិក្សាឈ្វេងយល់អំពីស្ថានភាពសិទ្ធិមនុស្ស និងការអនុវត្តច្បាប់ ព្រមទាំងប្រមូលព័ត៌មានទាក់ទងនឹងវិស័យជាសមត្ថ- កិច្ចរបស់​គណៈកម្មការទី១ព្រឹទ្ធ សភា ។

ឯកឧត្តម យ៉ង់ សែម ប្រធានគណៈកម្មការទី១ព្រឹទ្ធសភា បានមានប្រសាសន៍អំពីគោលបំណងនៃបេសកកម្ម គឺសំដៅសិក្សា ឈ្វេងយល់ឲ្យកាន់តែស៊ីជម្រៅលើវិស័យជំនាញរបស់គណៈកម្មការ ដូចជាការអនុវត្តច្បាប់ និងបញ្ហាជាក់ស្តែងមួយចំនួន ដូចជា ករណីទំនាស់ដីធ្លី ការជួញដូរស្រ្តី និងកុមារ អំពើមនុស្សឃាត ការរំលោភសេពសន្ថវៈ  អំពើហិង្សាគ្រប់រូបភាព ការ ឃុំឃាំងមនុស្សខុសនីតិវិធី ដែលកើតមាននៅក្នុងខេត្តព្រះសីហនុទាំងមូល។
ឯកឧត្តម  ចីវ គឹមហេង អភិបាលរងខេត្តព្រះសីហនុ បានធ្វើសេចក្តីរាយការណ៍សង្ខេបអំពីការងារទូទៅរបស់ខេត្តព្រះសីហនុ  ដូចជាលក្ខណៈភូមិសាស្ត្រ សន្តិសុខសណ្តាប់ធ្នាប់សាធារណៈ ការងារបង្កបង្កើនផលរបស់ប្រជាពលរដ្ឋ និងការកសាង ហេដ្ឋារចនាសម្ព័ន្ធលើគ្រប់វិស័យ ។
ឯកឧត្តមអភិបាលរងខេត្តបានមានប្រសាសន៍ថា  មន្ត្រីគ្រប់លំដាប់ថ្នាក់ និងអាជ្ញាធរខេត្តបានខិតខំអនុវត្តកម្មវិធីនយោបាយ របស់រាជរដ្ឋាភិបាល និងទិសដៅភារកិច្ចរបស់ក្រសួងមហាផ្ទៃ ខេត្ត ដោយយកចិត្តទុកដាក់ដឹកនាំការងារអភិវឌ្ឍនៅតាម ជំហាននីមួយៗ ធ្វើឲ្យមានការប្រែប្រួល និងរីកចម្រើនជាបន្តបន្ទាប់លើគ្រប់វិស័យ។ ជាក់ស្តែងវិស័យសន្តិសុខ សណ្តប់ធ្នាប់ សាធារណៈ ខេត្តបានយកចិត្តទុកដាក់អនុវត្តជាប្រចាំ លើការងារទប់ស្កាត់បទល្មើស លួច ឆក់ ប្លន់ ភាពអនាធិបតេយ្យ ការជួញដូរស្រ្តី និងកុមារ ការជួញដូរគ្រឿងញៀន បាតុភាពក្មេងពាលា ក្រុមបងតូចបងធំ ដែលបង្កភាពអនាធិបតេយ្យ ក្នុងសង្គម រក្សាបានសន្តិសុខ សុវត្ថិភាពជូនប្រជាពលរដ្ឋ អ្នកវិនិយោគទុន ក៏ដូចជាភ្ញៀវទេសចរបានយ៉ាងល្អប្រសើរ ធ្វើឲ្យ បទល្មើសមានការថយចុះគួរឲ្យកត់សម្គាល់។
ឯកឧត្តមក៏បានមានប្រសាសន៍បន្តទៀតថា ចំពោះបញ្ហាទំនាស់ដីធ្លី អាជ្ញាធរខេត្តបានយកចិត្តទុកដាក់ជាបន្តបន្ទាប់ ពិសេស គឺការអនុវត្តគោលនយោបាយចាស់សកម្មភាពថ្មីលើវិស័យដីធ្លី ធ្វើឲ្យសភាពការណ៍បានធូរស្រាលឡើងវិញ។ គិតមកដល់ ពេលនេះការរអនុវត្តគោលនយោបាយចាស់សកម្មភាពថ្មីលើវិស័យដីធ្លី  ប្រជាពលរដ្ឋបានចំនួន៧៧៥គ្រួសារ ដែលស្ថិតនៅ ភូមិស្វាយ និងភូមិតាពៅ ក្នុងឃុំជើងគោ បានទទួលប័ណ្ណកម្មសិទ្ធិដីធ្លីរួចហើយ។
បន្ទាប់ពីបានស្តាប់របាយការណ៍របស់ឯកឧត្តអភិបាលរងខេត្ត ចៅក្រម ព្រះរាជអាជ្ញាអមសាលាដំបូង ស្នងការប៉ូលីស មេ បញ្ជាការរងកងរាជអាវុធហត្ថមេបញ្ជាការប្រតិបត្តិការសឹកនិងមន្ទីរពាក់ព័ន្ធនានារួចមកឯកឧត្តម យ៉ង់ សែម ប្រធានគណៈ- កម្មការទី១ព្រឹទ្ធសភា បានមានប្រសាសន៍វាយតម្លៃខ្ពស់ចំពោះអាជ្ញាធរគ្រប់លំដាប់ថ្នាក់ ដែលបានខិតខំបំពេញតួនាទីភារកិច្ច របស់ខ្លួនបានយ៉ាងល្អប្រសើរ។
ឯកឧត្តមប្រធានគណៈកម្មការ បានមានប្រសាសន៍បន្តថា  ចំពោះការលំបាក ការងាយស្រួល  បញ្ហាផ្សេងៗ និងសំណូម ដែលខេត្តបានលើកឡើង ឯកឧត្តមនឹងរៀបចំជារបាយការណ៍ជូនគណៈកម្មាធិការអចិន្ត្រៃយ៍ព្រឹទ្ធសភា និងព្រឹទ្ធសភាពេញ អង្គដើម្បីជ្រាបជាព័ត៌មានផងដែរ។
អត្ថបទ និងរូបភាព៖នាយកដ្ឋានព័ត៌មាន