នាថ្ងៃទី២៩  ខែសីហា  ឆ្នាំ២០១២ នៅសាលាខេត្តក្រចេះ  គណៈ ប្រតិភូគណៈកម្មការ កិច្ចការបរទេស សហប្រតិបត្តិការ អន្តរជាតិ ហៅកាត់ គណៈកម្មការទី៥ ព្រឹទ្ធសភា ដឹកនាំដោយ ឯកឧត្តម​  ឈិត គឹមយាត​ អនុប្រធានគណៈកម្មការ​​ទី៥ ព្រឹទ្ធសភា បានអញ្ជើញ ចុះទៅជួប សវនាការ ជាមួយនឹង អាជ្ញាធរខេត្ត មន្ទីរព័ត៌មាន ស្នងការនគបាល​​ មន្ទីរទេសចរណ៍ មន្ទីរទំនាក់ទំនង ព្រឹទ្ធសភា រដ្ឋសភា និងមន្ត្រីពាក់ព័ន្ធ សាលាខេត្ត ដែលដឹក​នាំដោយ ឯកឧត្តម សរ ចំរុង អភិបាលនៃ​​  គណៈអភិបាល​ខេត្តក្រចេះ ដើម្បី​សិក្សា ស្វែងយល់ អំពីការអនុវត្ត ច្បាប់អន្តោប្រវេសន៍ និងការផ្សព្វ​ផ្សាយ ​ព័ត៌មាននៅទូទាំងខេត្តក្រចេះ​។
ឯកឧត្តម ឈិត​ ​​គឹមយាត អនុប្រធានគណៈកម្មការទី៥ព្រឹទ្ធសភា បានមានប្រសាសន៍ពាំនាំនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាធម្ម ពោធិសាល ជា ស៊ីម ប្រធានព្រឹទ្ធសភា ឯកឧត្តម សាយ ឈុំ អនុប្រធានទី១ព្រឹទ្ធសភា និងឯកឧត្តម ទេព ងន អនុប្រធានទី២​ព្រឹទ្ធសភា ជូនចំពោះមន្រ្តីរាជការគ្រប់លំដាប់ថ្នាក់ និងប្រជាពលរដ្ឋទូទាំងខេត្តក្រចេះ។

ឯកឧត្តមអនុប្រធានគណៈកម្មការ ក៏បានជម្រាបជូនអំពីលទ្ធផលការងាររបស់ព្រឹទ្ធសភាដែលសម្រេចបាននៅដើមនីតិកាលទី៣ និងមុខងារសំខាន់ៗរបស់​គណៈកម្មការជំនាញទាំង៩ព្រឹទ្ធសភា មានចំនួន៣  គឺមុខងារនីតិកម្ម​ មុខងារផ្តល់ព័ត៌មាន និងមុខងារត្រួតពិនិត្យ ។
ឯកឧត្តម ឈិត​ ​​គឹមយាត អនុប្រធានគណៈកម្មការទី៥ព្រឹទ្ធសភា ​បានមានប្រសាសន៍បន្តថា គោលបំណងសំខាន់ៗនៃបេសកកម្មដែលគណៈប្រតិភូ​គណៈ​កម្មការទី៥ព្រឹទ្ធសភានាពេលនេះ​ គឺសំដៅសិក្សាស្វែងយល់ឲ្យ​កាន់​​តែស៊ីជម្រៅ ​​លើវិស័យជំនាញរបស់គណៈកម្មការ ដូចជាការអនុវត្តន៍​ច្បាប់​អន្តោ
​ប្រ​វេសន៍ ការផ្សព្វផ្សាយព័ត៌មាន ការទទួលព័ត៌មានរបស់ប្រជាពលរដ្ឋទូទាំងខេត្តក្រចេះ​ទាំងមូល​តាមរយៈវិឡុ ទូរទស្សន៍ កាសែត ទស្សនាវដ្តី ការគ្រប់ គ្រងជនបរទេស កិច្ចសហប្រតិបត្តិការរវាងអាជ្ញាធរ ច្រកទ្វារព្រំដែនរបស់ខេត្តក្រចេះ ជាមួយនឹងអាជ្ញាធរច្រកទ្វារ ព្រំដែនប្រ​ទេស​​វៀតណាម ការគ្រប់គ្រង ពលករខ្មែរឆ្លងដែនទៅធ្វើការនៅបរទេស និងការពង្រឹងទំនាក់ទំនងឲ្យកាន់តែជិតស្និទ្ធរវាង ព្រឹទ្ធសភា​ជាមួយនឹងអាជ្ញាធរខេត្តគ្រប់លំដាប់ថ្នាក់។
ឯកឧត្តម ឈិត​ ​​គឹមយាត អនុប្រធានគណៈកម្មការទី៥ព្រឹទ្ធសភា បានមានប្រសាសន៍បន្ថែមថា​ ចំពោះការលំបាក ឬភាពងាយស្រួល  និងបញ្ហារផ្សេងៗ ដែលឯឧត្តមអភិបាលនៃគណៈអភិបាលខេត្ត និងមន្ទីពាក់ព័ន្ធនានា បានលើកឡើង ឯកឧត្តមនឹងធ្វើរបាយការណ៍ជូនថ្នាក់ដឹនាំព្រឹទ្ធសភា និងក្រសួង ស្ថាប័នពាក់ព័ន្ធបានជ្រាបជាព័ត៌មាន។
ឯកឧត្តម សរ ចំរុង អភិបាលនៃគណៈអភិបាលខេត្តក្រចេះ ​បានធ្វើសេចក្តីរាយការណ៍សង្ខេប អំពីការងារទូទៅរបស់ខេត្ត ដូចជាលក្ខណៈភូមិសាស្ត្រ សន្តិសុខសណ្តាប់ធ្នាប់សាធារណៈ ការងារបង្កបង្កើនផលរបស់ប្រជាពលរដ្ឋ និងការកសាងហេដ្ឋារចនាសម្ព័ន្ធលើគ្រប់វិស័យ។ជាមួយគ្នានោះដែរ ឯកឧត្តមអភិបាលខេត្តបានមានប្រសាសន៍ថា ក្រោមការដឹកនាំរបស់ខេត្ត មន្រ្តីរាជការ និងប្រជាពលរដ្ឋបាននឹង កំពុងខិតខំអនុវត្តការងារយ៉ាងសកម្ម ដើម្បីសម្រេចឲ្យបានជោគជ័យនូវភារកិច្ចរបស់ខ្លូន និងគោលនយោបាយរបស់រាជរដ្ឋាភិបាលធានាទទួលបាននូវសុខសន្តិភាព សុវត្ថិភាព ស្ថិរភាព នយោបាយ និងការអភិវឌ្ឍសេដ្ឋកិច្ច សង្គមកិច្ច និងការពារធនធានធម្មជាតិបានល្អប្រសើរ។
ឯកឧត្តមអភិបាលខេត្តក៏បានមានប្រសាសន៍បន្តថា ទន្ទឹមនឹងសកម្មភាពខាងលើ ខេត្ត​​កំពុង​យកចិត្តទុកដាក់ខ្ពស់ ក្នុងការអនុវត្តគោលនយោបាយចាស់ សកម្មភាពថ្មីលើវិស័យដីធ្លី​ ជាពិសេសបទបញ្ជាលេខ០០១​របស់រាជរដ្ឋាភិបាល ខេត្តបានខិតខំអនុវត្តយ៉ាងសកម្ម ជាលទ្ធផល សម្រចបានគិតត្រឹមថ្ងៃទី ២៨ ខែសីហា ឆ្នាំ២០១២ ក្រុមការងារចុះវាស់វែងដីធ្លីជូនប្រជាពលរដ្ឋក្នុងខេត្តក្រចេះយ៉ាងសកម្ម និងទទួលបានលទ្ធផលគួរជាទីមោទនៈ។
នៅក្នុងឱកាសនោះដែរ លោកស្នងការនគរបាលខេត្ត បានធ្វើសេចក្តីរាយការណ៍អំពីការងារពាន់ព័ន្ធទៅនឹងការអនុវត្តច្បាប់អន្តោប្រវេសន៍ ការគ្រប់គ្រង ជនបរទេសនៅទូទាំងខេត្ត និងការគ្រប់គ្រងពលករខ្មែរឆ្លងដែនទៅធ្វើការនៅបរទេស និងលោកស្រីប្រធានមន្ទីរព័ត៌មានខេត្តបានធ្វើសេចក្តីរាយការណ៍ អំពីការអនុវត្តច្បាប់ស្តីពីរបបសារព័ត៌មាន​ សកម្មភាពផ្សព្វផ្សាយព័ត៌មាន និងការទទួលព័ត៌មានរបស់ប្រជាពលរដ្ឋនៅទូទាំងខេត្តក្រចេះផងដែរ៕ រូបភាព និងអត្ថបទៈនាយកដ្ឋានព័ត៌មាន