នារសៀលថ្ងៃទី០៧ ខែកក្កដា ឆ្នាំ២០២២ វេលាម៉ោង ១៤:៣០នាទី (ម៉ោងនៅទីក្រុងហ្គីហ្គាលី) ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា, អនុប្រធានគណៈកម្មាធិការអចិន្ត្រៃ យ៍ នៃក្រុមសភាជាតិកម្ពុជា-APF និងជាប្រធានគណៈប្រតិភូនៃក្រុមសភាជាតិ កម្ពុជា បានអញ្ជើញបន្តចូលរួមកិច្ចប្រជុំគណៈកម្មការនយោបាយ ក្នុងឱកាសមហាសន្និបាតលើកទី៤៧ នៃសភានិយាយភាសាបារាំង (APF) នៅ Centre de Convention ទីក្រុងហ្គីហ្គាលី ប្រទេសរវ៉ាន់ដា ក្រោមអធិបតីភាព ឯកឧត្តម Dennis Dawson សមាជិកព្រឹទ្ធសភាកាណាដា និងជាអ្នកធ្វើរបាយការណ៍ (Rapporteur) នៃគណៈកម្មការនយោបាយ-APF។
ខ្លឹមសារនៃកិច្ចប្រជុំបន្តរួមមាន៖ -ពិភាក្សាអំពីរបាយការណ៍ស្តីពីការប្រើប្រាស់ភាសាបារាំងនៅក្នុងអង្គការអន្តរជាតិនានា -ពិភាក្សាអំពីតួនាទីគន្លឹះនៃពហុភាគីនិយមក្នុងការលើកកម្ពស់លទ្ធិប្រជាធិបតេយ្យ និងសន្តិភាពយូរអង្វែង -អនុម័តសេចក្តីព្រាងនៃសេចក្តីសម្រេចចិត្តនានាដូចជា៖ ១/សមត្ថកិច្ច និងសកម្មភាពរបស់សភានៅក្នុងស្ថានភាពបន្ទាន់។ សេចក្តីសម្រេចចិត្តតាក់តែងឡើងរួមគ្នារវាងគណៈកម្មការនយោបាយ និងគណៈកម្មការអប់រំ ទំនាក់ទំនង និងកិច្ចការវប្បធម៌។ ២/ផលប៉ះពាល់នៃបញ្ញាសិប្បនិម្មិតទៅលើសិទ្ធិបុគ្គល នីតិរដ្ឋ និងលទ្ធិប្រជាធិបតេយ្យ។ -ពិភាក្សាអំពីសមាសភាពគណៈកម្មាធិការអចិន្រ្តៃយ៍នៅក្នុងគណៈកម្មការនយោបាយសម្រាប់ឆ្នាំ ២០២២-២០២៤។ -កិច្ចប្រជុំគណៈកម្មការនយោបាយនៅព្រឹទ្ធសភាបារាំង នានិទាឃរដូវ។
