ឯកឧត្តម ម៉ម ប៊ុននាង អញ្ជើញជួបសំណេះសំណាលជាមួយនឹងអាជ្ញាធរភូមិ ឃុំ និងប្រជាពលរដ្ឋចំនួន២៩៤នាក់ នៅឃុំត្រពាំងវែង ស្រុកកណ្តាលស្ទឹង ខេត្តកណ្តាល

នាព្រឹកថ្ងៃទី២៧ ខែឧសភា ឆ្នាំ២០២៣ ឯកឧត្តម ម៉ម ប៊ុននាង ប្រធានគណៈកម្មការទី១០ព្រឹទ្ធសភា និងជាអ្នកនាំពាក្យព្រឹទ្ធសភា បានអញ្ជើញចុះជួបសំណេះសំណាលជាមួយនឹងអាជ្ញាធរភូមិ ឃុំ និងប្រជាពលរដ្ឋចំនួន២៩៤នាក់ ស្ថិតនៅឃុំត្រពាំងវែង ស្រុកកណ្តាលស្ទឹង ខេត្តកណ្តាល។

ក្នុងឱកាសនោះ ឯកឧត្តម ម៉ម ប៊ុននាង បានពាំនាំនូវសេចក្តីនឹករលឹក និងការផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងលោកជំទាវ ជូនចំពោះអាជ្ញាធរ និងបងប្អូនប្រជាពលរដ្ឋទាំងអស់។

ជាមួយគ្នានេះដែរ ឯកឧត្តម ម៉ម ប៊ុននាង បានអំពាវនាវដល់អាជ្ញាធរមូលដ្ឋាន ព្រមទាំងប្រជាពលរដ្ឋទាំងអស់ ឱ្យបន្តអនុវត្ត និងចូលរួមអនុវត្តគោលនយោបាយភូមិ ឃុំ សង្កាត់មានសុវត្ថិភាព ដើម្បីកាត់បន្ថយ និងឈានទៅលុបបំបាត់បញ្ហាគ្រឿងញៀន អំពើចោរកម្ម ល្បែងស៊ីសងគ្រប់ប្រភេទក្នុងមូលដ្ឋានរបស់ខ្លួន និងចូលរួមថែរក្សាសន្តិសុខ សណ្តាប់ធ្នាប់ អនាម័យ និងបរិស្ថានឱ្យកាន់តែប្រសើរ។

ទន្ទឹមនោះដែរ ឯកឧត្តមក៏បានអញ្ជើញបងប្អូនប្រជាពលរដ្ឋទាំងអស់ ឱ្យទៅចូលរួមបោះឆ្នោតជ្រើសតាំងតំណាងរាស្រ្ត នីតិកាលទី៧ នៃរដ្ឋសភា ដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខ ឱ្យបានគ្រប់ៗគ្នា ដើម្បីសន្តិភាព វិបុលភាព និងការអភិវឌ្ឍប្រកបដោយចីរភាព។

ក្នុងបរិយាកាសដ៏ស្និតស្នាលនោះដែរ ឯកឧត្តម ម៉ម ប៊ុននាង បានឧបត្ថម្ភដល់ប្រជាពលរដ្ឋ អាជ្ញាធរភូមិ ឃុំ ទាំង ២៩៤នាក់ ដោយក្នុងម្នាក់ៗទទួលបានថវិកា ២ ម៉ឺនរៀល ឧបត្ថម្ភមណ្ឌលសុខភាពឃុំត្រពាំងវែង ថវិកា ៨ លានរៀល ចូលបច្ច័យបុណ្យសពប្រជាពលរដ្ឋចំនួន៧គ្រួសារ ក្នុងមួយគ្រួសារទទួលបានថវិកាចំនួន ២០ ម៉ឺនរៀល ដោយចំណាយថវិកាទាំងអស់សរុបចំនួន ១៦,២០០,០០០រៀល (ដប់ប្រាំមួយលាន ពីរសែនរៀល)៕

---