លោកជំទាវ មាន សំអាន ប្រធានក្រុម និងជាប្រធានគណៈកម្មការទី៨ ព្រឹទ្ធសភាបានអញ្ជើញចុះជួបពិភាក្សាការងារ ដើម្បីឈ្វេងយល់អំពីវឌ្ឍនភាពចែករលែក និងផ្តល់ព័ត៌មាន
ថ្ងៃទី 9 ខែមេសា ឆ្នាំ2024
នាព្រឹកថ្ងៃអង្គារ ៥កើត ខែចេត្រ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ០៩ ខែមេសា ឆ្នាំ២០១៩ គណៈប្រតិភូក្រុមសមាជិកព្រឹទ្ធសភាប្រចាំភូមិភាគទី៦ ដឹកនាំដោយលោកជំទាវ មាន សំអាន ប្រធានក្រុម និងជាប្រធានគណៈកម្មការទី៨ ព្រឹទ្ធសភា ដោយមានការចូលរួមពីលោក កែវ ពិសី អភិបាលនៃអភិបាលស្រុកមេសាង បានអញ្ជើញចុះជួបពិភាក្សាការងារ ដើម្បីឈ្វេងយល់អំពីវឌ្ឍនភាព ចែករលែក និងផ្តល់ព័ត៌មានជូន មេឃុំ ជំទប់ទី១ ជំទប់ទី២ និងសមាជិកក្រុមប្រឹក្សាឃុំ ស្មៀនឃុំ នាយប៉ុស្តិ៍នគរបាលរដ្ឋបាល នៃឃុំស្វាយជ្រុំ និងឃុំព្រៃទទឹង អំពីបញ្ហាពាក់ព័ន្ធនឹងការងារ ភូមិ-ឃុំ មានសុវត្ថិភាព, ការផ្តល់សេវាសាធារណៈ និងការគ្រប់គ្រងធនធានធម្មជាតិ នៅសាលាឃុំស្វាយជ្រុំ ស្រុកមេសាង ខេត្តព្រៃវែង។
ក្នុងឱកាសនោះដែរ គណៈប្រតិភូ ក៏បានផ្តល់ថវិកាចំនួន ១,៧៥០,០០០៛ ( មួយលានប្រាំពីររយហាសិបពាន់រៀល ) ដល់សាលាឃុំស្វាយជ្រុំ ដើម្បីជីកអណ្តូងទឹក ចំនួន ០១កន្លែង ស្ថិតនៅសាលាបឋមសិក្សាវត្តភ្នៀត សម្រាប់ប្រើប្រាស់ជាសាធារណៈ និងឧបត្ថម្ភអ្នកចូលរួមទាំងអស់ សរុប ២៥នាក់ ក្នុងម្នាក់ថវិកាចំនួន ៥០,០០០៛ ( ហាសិបពាន់រៀល ) ផងដែរ ៕
