នៅថ្ងៃទី១៤ ខែមីនា ឆ្នាំ២០១៩ វេលាម៉ោង ០៨:៣០ នាទីព្រឹក គណៈប្រតិភូគណៈកម្មការ ទី៨ ព្រឹទ្ធសភា អមដំណើរដោយអភិបាលរងខេត្ត បានអញ្ជើញជួបសំណេះសំណាលជាមួយបុគ្គលិកសុខាភិបាល និងប្រជាពលរដ្ឋ ដែលមកទទួលសេវាសុខាភិបាល នៅមណ្ឌលសុខភាពប៉ាក់ខ្លង ស្ថិតក្នុងភូមិ១ ឃុំប៉ាក់ខ្លង ស្រុកមណ្ឌលសីមា ខេត្តកោះកុង។ ក្នុងមណ្ឌលសុខភាពនេះ មានបុគ្គលិកសុខាភិបាល ចំនួន ០៨ នាក់ ដែលផ្តល់សេវាលើផ្នែកសុខភាពមាតា និងទារក ផ្នែកផ្តល់ថ្នាំបង្ការ ផ្នែកពិនិត្យ និងពិគ្រោះជំងឺទូទៅ ផ្នែកជំងឺឆ្លង និងផ្នែកផ្សេងៗ។
ជាក់ស្តែងក្នុងខែកុម្ភៈ ឆ្នាំ២០១៩ មណ្ឌលសុខភាពប៉ាក់ខ្លង បានទទួលពិនិត្យផ្ទៃពោះសរុប ៦៦នាក់ ក្នុង១ខែ ការបង្ការការពារដូចជា ជំងឺតេតាណុសស្រ្តីមានផ្ទៃពោះចំនួន ២៩នាក់ ជំងឺខាន់ស្លាក់ តេតាណូស ក្អកមាន់ រលាកថ្លើមប្រភេទ B រលាកសួត រលាកស្រោមខួរ ស្វិតដៃជើង ចំនួន ៣២នាក់ របេងចំនួន ០៥នាក់ ជំងឺកញ្ជ្រិលអាយុក្រោម១ឆ្នាំ ចំនួន ២០នាក់ ពិនិត្យព្យាបាលជំងឺទូទៅចំនួន ៥៣១នាក់ (ស្រ្តី៣៣១) និងជំងឺឆ្លងផ្សេងៗចំនួន ១៩នាក់ ។
ជាមួយគ្នានោះដែរ គណៈកម្មការ ក៏បានឧបត្ថម្ភដល់មណ្ឌលសុខភាពចំនួន ៥០០,០០០រៀល និងស្ត្រីទើបសម្រាលដែលកំពុងសម្រាកក្នុងមណ្ឌលសុខភាព ថវិកាចំនួន ៥០,០០០រៀលផងដែរ។
