លោកជំទាវ មាន សំអាន ចុះសហការជាមួយនឹងក្រុមសប្បុរសជនវៀតណាម ចែកអំណោយជូនប្រជាពលរដ្ឋចំនួន៤០០នាក់ នៅឃុំកំពង់លួង ស្រុកក្រគរ ខេត្តពោធិ៍សាត់
ថ្ងៃទី 18 ខែសីហា ឆ្នាំ2025
កាលពីព្រឹកថ្ងៃទី១៦ ខែសីហា ឆ្នាំ២០១៤ លោកជំទាវ មាន សំអាន ប្រធានគណៈ កម្មការទី៨ព្រឹទ្ធសភា និងជាប្រធានក្រុមមិត្តភាពទ្វេភាគីកម្ពុជាវៀតណាម និងជាអនុប្រធាន សមាគមន៍នារីកម្ពុជា ដើម្បីសន្តិភាព និងអភិវឌ្ឍ បានចុះសហការជាមួយនឹងក្រុមសប្បុរសជនវៀតណាម ដើម្បីចុះចែកអំណោយជូនប្រជាពលរដ្ឋក្រីក្រចំនួន៤០០នាក់ នៅឃុំកំពង់លួង ស្រុកក្រគរ ខេត្តពោធិ៍សាត់ ដោយមានការអញ្ជើញចូលរួមពីលោកជំទាវ ឯម ប៉ុណ្ណា សមាជិការដ្ឋសភា លោកជំទាវ ជុក សុផាន់នី អភិបាលរងខេត្តពោធិ៍សាត់។
លោកជំទាវ ជុក សុផាន់នី អភិបាលរងខេត្តពោធិ៍សាត់ បានមានប្រសាសន៍ថ្លែងអំណរគុណយ៉ាងជ្រាលជ្រៅដល់ក្រុមសប្បុរសជនវៀតណាម ដែលជានិច្ចកាលតែងតែងចុះចែកអំណោយដល់ប្រជាពលរដ្ឋទូទាំងព្រះរាជាណាចក្រកម្ពុជា ជាក់ស្តែងនៅស្រុកក្រគរ ខេត្តពោធិ៍សាត់នាពេលនេះ។ ដែលអ្វីទាំងនេះបង្ហាញពីការសហការគ្នាយ៉ាងល្អរវាងសមាគមន៍ នារីកម្ពុជា ដើម្បីសន្តិភាព និងអភិវឌ្ឍ ជាមួយនឹងសមាគន៍នារីវៀតណាម ជាពិសេសបង្ហាញ ពីការស្រលាញ់រាបអានគ្នារវាងប្រជាជននៃប្រទេសទាំងពីរផងដែរ។
លោកជំទាវ អភិបាលរងខេត្តពោធិ៍សាត់ បានមានប្រសាសន៍បន្តថា ទោះបីជាអំណោយទាំងនេះមិនឆ្លើយតបទៅនឹងតម្រូវការរបស់ប្រជាពលរដ្ឋក៏ដោយ តែនេះជាការចូលរួមចំណែកក្នុងការជួយបងប្អូនឲ្យរួចផុតពីភាពអត់ឃ្លានបានមួយចំណែក។
លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា ជាប្រធានក្រុមមិត្តភាពទ្វេភាគីកម្ពុជាវៀតណាម និងជាអនុប្រធានសមាគមន៍នារីកម្ពុជា ដើម្បីសន្តិភាព និងអភិវឌ្ឍ បានមានប្រសាសន៍ថ្លែងអំណរគុណដល់ក្រុមសប្បុរសជនវៀតណាមដែលបាននាំយកអំណោយដ៏ថ្លៃថ្លានេះមកចែកជូនដល់ប្រជាពលរដ្ឋក្រីក្រនៅក្នុងខេត្តពោធិ៍សាត់។
លោកជំទាវ បានមានប្រសាសន៍វាយតម្លៃខ្ពស់ចំពោះទឹកចិត្តមនុស្សធម៌ មិនអាចកាត់ថ្លៃបានរបស់ក្រុមសប្បុរសជនវៀតណាម ដែលជានិច្ចកាលតែងតែនាំយកអំណោយមកចែកជូនដល់ប្រជាពលរដ្ឋកម្ពុជា ក្នុងការជួយចែករំលែកកាលំបាក និងជាការចូលរួមកាត់បន្ថយភាពក្រីក្ររបស់បងប្អូនប្រជាពលរដ្ឋកម្ពុជាយើងផងដែរ។
លោកជំទាវ បានមានប្រសាសន៍ផ្តាំផ្ញើរដល់បងប្អូនប្រជាពលរដ្ឋទាំងអស់ដែលកំពុងជួបការលំបាកនាពេលនេះ ត្រូវចេះស្រលាញ់ និងចេះជួយគ្នាទៅវិញទៅមក និងសូមឲ្យ ថែរក្សាសុខភាពឲ្យបានល្អ និងមានការប្រុងប្រយ័ត្នខ្ពស់ពីព្រោះរដូវនេះជារដូវវស្សា ទឹកមានការជនឡើងជាលំដាប់។
អំណោយដែលក្រុមសប្បុរសជនវៀតណាម បាននាំយកចែកជូនប្រជាពលរដ្ឋចំនួន៤០០នាក់ នាឱកាសនោះ ដោយក្នុងម្នាក់ៗទទួលបាន មី១កេស ទឹកស៊ីអ៊ីវ១ដប ប្រេងខ្យល់១ដប និងថវិកា២៥.០០០រៀល៕
អត្ថបទនិងរូបភាពនាយកដ្ឋានព័ត៌មាន
អត្ថបទពាក់ព័ន្ធ
