កាលពីថ្ងៃទី២២ ខែធ្នូ ឆ្នាំ២០១២ លោកជំទាវ មាន សំអាន ប្រធានគណៈកម្មការ សុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការ នារី ហៅកាត់ គណៈកម្មការ ទី៨ព្រឹទ្ធសភា ប្រធានក្រុមមិត្តភាពទ្វេភាគី ព្រឹទ្ធសភា នៃព្រះរាជាណា- ចក្រកម្ពុជា ជាមួយសភាសាធារណរដ្ឋសង្គមនិយមវៀតណាម និងជា អនុប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បាន សហការជាមួយនឹង ក្រុមសប្បុរសជនប្រទេសវៀតណាម នៅទីក្រុង ហូជីមិញ ចំនួន៣៥នាក់ ដឹកនាំដោយព្រះតេជគុណ ថៃ មិន ហ្វូ បាន នាំយកអំណោយ ទៅចែក ជូនបងប្អូនប្រជាពលរដ្ឋក្រីក្រចំនួន ៣០០ នាក់និងកុមារាកុមារីចំនួន៥០០នាក់នៅឃុំរាំងទិលស្រុកកណ្តៀងខេត្តពោធិ៍សាត់។
នាក្នុងឱកាសនោះដែរ លោកជំទាវ មាន សំអាន ប្រធានគណៈកម្មកាទី៨ព្រឹទ្ធសភា បានមានប្រសាសន៍ពាំនាំនូវការផ្តាំផ្ញើ
សាកសួរសុខទុក្ខពីសំណាក់ សម្តេច អគ្គមហាធម្មពោធិ សាល ជា ស៊ីមប្រធានព្រឹទ្ធសភា ឯកឧត្តម សាយ ឈុំ អនុប្រធានទី១ ព្រឹទ្ធសភា ឯកឧត្តម ទេព ងនអនុប្រធានទី២ព្រឹទ្ធសភា និងលោកជំទាវ ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច និងជា ប្រធាន សមាគមនារីកម្ពុជា ដើម្បីសន្តិភាព និងអភិវឌ្ឍន៍ដែលជានិច្ចកាលតែងតែយក ចិត្តទុកដាក់ និងគិតគូរអំពីសុខទុក្ខរបស់បងប្អូនប្រជាពលរដ្ឋ ទូទាំងប្រទេស ក៏ដូចជាប្រជាពលរដ្ឋនៅ ក្នុងខេត្ត ពោធិ៍សាត់ ទាំងមូល។
លោកជំទាវបានមានប្រសាសន៍បន្តថា វត្តមានរបស់ក្រុមសប្បុរសជននៃទីក្រុងហូជីមិញប្រទេសវៀតណាម ដែលបានអញ្ជើញ ចុះមកចែកអំណោយជូនដល់ប្រជាពលរដ្ឋកម្ពុជា នាពេលនេះ គឺជាការឆ្លុះបញ្ចាំងឲ្យយើងឃើញពីទឹកចិត្តមនុស្សធម៌ ដែលមិនអាចកាត់ថ្លៃបាន និងការនឹករលឹកស្រឡាញ់ បងប្អូន ប្រជាពលរដ្ឋ។
លោកជំទាវបានមានប្រសាសន៍បន្ថែមថា តាមរយៈសកម្មភាពមនុស្សធម៌ និងការនាំ យកអំណោយជូនប្រជាពលរដ្ឋក្រីក្រនាពេលនេះ ពិតជានាំមកនូវការពង្រឹងពង្រីកទំនាក់ទំនង មិត្តភាព សាមគ្គីភាព និងកិច្ចសហប្រតិបត្តិការ ល្អរ វាងប្រទេស ទាំងពីរ កម្ពុជា-វៀតណាមឲ្យមាន ការរីកចម្រើនថែមទៀត។
ក្នុងឱកាសនេះដែរលោកជំទាវ និងក្រុមសប្បុរសជនក៏បានចែកអំណោយជូនទៅដល់ ប្រជាពលរដ្ឋចំនួន៣០០នាក់ ក្នុង ម្នាក់ៗ ទទួលបាន អង្ករ១០គីឡូក្រាម មី០១កេស ទឹកដោះ គោ០២កំប៉ុង ស្ករ-ស០១គីឡូក្រាម ប្រេងឆា០១ដប នំ០១ប្រអប់ និងថវិកាចំនួន០២ម៉ឺនរៀល និងកុមារា កុមារីចំនួន៥០០នាក់ ក្នុងម្នាក់ៗទទួលបាននំ០២ប្រអប់ ថ្នាំដុសធ្មេញ០១ប្រអប់ ទឹកដោះគោ០១កំប៉ុង ទឹកដោះគោក្រដាស០២ប្រអប់ ស្ករគ្រាប់០២កញ្ចប់ និងសម្លៀកបំពាក់មួយចំនួនទៀត។
