កាលពីថ្ងៃទី០៤ ខែឆ្នូ ឆ្នាំ២០១២ គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារបណ្តុះបណ្តាល វិជ្ជាជីវៈ និងកិច្ចការនារី ហៅកាត់គណៈកម្មការទី៨ព្រឹទ្ធសភា ដឹកនាំដោយលោកជំទាវ មាន សំអាន ប្រធានគណៈកម្មការ បាន អញ្ជើញជួប​ពិភាក្សាការងារ ជាមួយនឹងឯកឧត្តម អ៊ិត សំហេង រដ្ឋមន្ត្រីក្រសួងសង្គមកិច្ច​ អតីតយុទ្ធជន និង យុវនីតិសម្បទា នៅ ទីស្តីការក្រសួង។

ឯកឧត្តម​ អ៊ិត​ សំហេង រដ្ឋមន្ត្រីក្រសួងសង្គមកិច្ច អតិតយុទ្ធជន និងយុវនីតិសម្បទា បានមានប្រសាសន៍ ស្វាគមន៍យ៉ាងកក់ក្តៅ និងកោតសរសើចំពោះវត្តមាន​របស់គណៈប្រតិភូគណៈ​កម្មការទី៨ព្រឹទ្ធសភា​​​ ដែលបានអញ្ជើញចុះឈ្វេងយល់អំពីការងារ ដែល ក្រសួងបាន​អនុវត្ត​នាពេល កន្លងមក។​

 ឯកឧត្តមក៏បានរាយការណ៍អំពីលទ្ធផល​ការងារ​​រយៈពេល៩ខែ​ ឆ្នាំ២០១២ និងទិសដៅ​អនុវត្តបន្តសម្រាប់ត្រីមាសទី៤ ដែលរួម មាន៖ ទី១ ពង្រឹងពង្រីកសេវាសុខុមាលភាព សង្គមសម្រាប់ ជនក្រីក្រងាយរងគ្រោះ ទី២ ពង្រឹងពង្រីកសេវាសុខុមាលភាពកុមារ​ និងយុវនីតិ​សម្បទា ទី៣​ ពង្រឹង ពង្រីកសេវាសុខុមាលភាពជនពិការ និងស្តារលទ្ធភាពពលកម្ម ទី៤ ពង្រឹងពង្រីករបបសន្តិសុខ សង្គម សុខុមាលភាពមនុស្សចាស់ មន្ត្រីរាជការស៊ីវិល និងប្រជាជនទូទៅ​ ទី៥ ពង្រឹងពង្រីករបប​សន្តិសុខ​សង្គម​ និងសុខុមាលភាពនៃអតីតយុទ្ធជន​​​ ទី៦ ពង្រឹងពង្រីកសមត្ថភាពស្ថាប័ន ភាពជាដៃគូ ​កៀរគរ ប្រភពធនធាន បង្កើនប្រសិទ្ធភាព នៃសេវាសង្គមកិច្ច។

លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា បានជម្រាបជូនអំពីលទ្ធផល ការងាររបស់ព្រឹទ្ធសភា ដែល សម្រេចបាន នៅដើមនីតិកាលទី៣ គឺបន្ទាប់ពីបានបោះឆ្នោតជ្រើស តាំងសមាជិកព្រឹទ្ធសភា នីតិកាលទី៣​ កាលពីថ្ងៃទី២៩ ខែមករា ឆ្នាំ២០១២ និងតួនាទីភារកិច្ចរបស់ គណៈកម្មការទី៨ព្រឹទ្ធសភា ព្រមទាំងមុខងារទាំងបីរបស់​ព្រឹទ្ធសភា គឺមុខងារនីតិកម្ម មុខងារ តំណាង និងមុខងារត្រួតពិនិត្យ។

លោកជំទាវប្រធានគណៈកម្មការទី៨ព្រឹទ្ធសភា បានបន្តថា មុខងារទាំងបីនេះមានសំខាន់ ណាស់​ក្នុងការជួយជំរុញឲ្យសេចក្តី ព្រាងច្បាប់ សេចក្តីស្នើច្បាប់ ដែលរាជរដ្ឋាភិបាល បាននឹងកំពុង តាក់តែងឡើង​កាន់តែមានប្រសិទ្ធភាព ជាងមុនថែមទៀត​ ដើម្បី បម្រើផល ប្រយោជន៍ជូនសង្គមជាតិ ​និងប្រជាពលរដ្ឋទូទាំងប្រទេសឲ្យកាន់តែមានតម្លាភាព និងសុក្រិតយុត្តិធម៌។