គណៈប្រតិភូគណៈកម្មការទី៨ព្រឹទ្ធសភា ចុះឈ្វេងយល់ និងប្រមូលព័ត៌មានពាក់ព័ន្ធទៅនឹងវិស័យជាសមត្ថកិច្ចរបស់គណៈកម្មការ នៅខេត្តបន្ទាយមានជ័យ
ថ្ងៃទី 8 ខែតុសា ឆ្នាំ2025
កាលពីរសៀលថ្ងៃទី០៣ ខែតុលា ឆ្នាំ២០១២ គណៈប្រតិភូគណៈកម្មការសុខាភិបាល សង្គម កិច្ច អតីតយុទ្ធជន យុវនីតិសម្បទា ការងារបណ្តុះបណ្តាលវិជ្ជាជីវៈ និងកិច្ចការនារី (ហៅកាត់គណៈកម្មការទី៨ព្រឹទ្ធសភា) ដឹកនាំដោយលោកជំទាវ មាន សំអាន ប្រធានគណៈកម្មការ បានអញ្ជើញជួបសវនាការជាមួយនឹងឯកឧត្តម រៀម សារិន អភិបាលរងខេត្តបន្ទាយមានជ័យ ដើម្បីឈ្វេងយល់ និងប្រមូលព័ត៌មានពាក់ព័ន្ធទៅនឹងវិស័យជាសមត្ថកិច្ចរបស់គណៈកម្មការ ដោយផ្តោតសំខាន់ទៅលើការទប់ស្កាត់អំពើជួញដូរមនុស្ស ការធ្វើអាជីវកម្មផ្លូវភេទ និងការធ្វើចំណាកស្រុករបស់ប្រជាពលរដ្ឋ ទៅរកការងារធ្វើទាំងក្នុង និងក្រៅប្រទេស ព្រមទាំងការអភិវឌ្ឍទូទាំងខេត្ត និងការអនុវត្តការងាររបស់ក្រុមប្រឹក្សាឃុំ-សង្កាត់ ដើម្បីកសាងទំនាក់ទំនងឲ្យកាន់ជិតស្និទ្ធជាងមុនថែម ទៀតរវាងសមាជិក សមាជិកាព្រឹទ្ធសភាជាមួយនឹងរដ្ឋបាលថ្នាក់ក្រោមជាតិ នៅសាលប្រជុំសាលាខេត្តន្ទាយមានជ័យ ដោយមានការចូលរួមពីប្រធាន អនុប្រធានមន្ទីរពាក់ព័ន្ធនានាក្នុងខេត្ត។
មានប្រសាសន៍នាឱកាសនោះ លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាធម្មពោធិសាល ជា ស៊ីម ប្រធាន ព្រឹទ្ធសភា ឯកឧត្តម សាយ ឈុំ អនុប្រធានទី១ព្រឹទ្ធសភា ឯកឧត្តម ទេព ងន អនុប្រធានទី២ ព្រឹទ្ធសភា និងសមាជិក សមាជិកាព្រឹទ្ធសភា ជូនចំពោះថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ គ្រប់លំដាប់ថ្នាក់ និងប្រជាពលរដ្ឋទូទាំងខេត្តបន្ទាយមានជ័យ។លោកជំទាវ ប្រធានគណៈកម្មការទី៨ព្រឹទ្ធសភា ក៏បានមានប្រសាសន៍បញ្ជាក់អំពីលទ្ធផលការ ងារដែលសម្រេចបានរបស់ព្រឹទ្ធសភា នៅដើមនីតិកាលទី៣ បន្ទាប់ពីបានបោះឆ្នោតជ្រើសតាំងសមាជិក ព្រឹទ្ធសភា នីតិកាលទី៣ កាលពីថ្ងៃទី២៩ ខែមករា ឆ្នាំ២០១២រួចមក។ ព្រមទាំងតួនាទី ភារកិច្ចរបស់ គណៈកម្មការទាំង៩ព្រឹទ្ធសភា និងមុខងារទាំងបីរបស់ព្រឹទ្ធសភា គឺមុខងារនីតិកម្ម មុខងារតំណាង និង មុខងារត្រួតពិនិត្យ។
លោកជំទាវ ប្រធានគណៈកម្មការទី៨ព្រឹទ្ធសភា បានមានប្រសាសន៍បន្តថា មុខងារទាំងបីនេះ មានសារសំខាន់ណាស់ ក្នុងការជួយជំរុញឲ្យសេចក្តីព្រាងច្បាប់ សេចក្តីស្នើច្បាប់ ដែលរាជរដ្ឋាភិបាល បាននឹងកំពុងតាក់តែងឡើង កាន់តែមានប្រសិទ្ធភាពជាងមុនថែមទៀត ដើម្បីបម្រើផលប្រយោជន៍ជូន សង្គមជាតិ និងប្រជាពលរដ្ឋទូទាំងប្រទេសឲ្យកាន់តែមានតម្លាភាព និងសុក្រិតយុត្តិធម៌។
មានប្រសាសន៍នាឱកាសនោះដែរ ឯកឧត្តម រៀម សារិន អភិបាលរងខេត្តបន្ទាយមានជ័យ បានសម្តែងនូវការស្វាគមន៍យ៉ាងកក់ក្តៅ និងកោតសរសើរចំពោះវត្តមានរបស់គណៈប្រតិភូគណៈកម្មការទី៨ព្រឹទ្ធសភា ដែលបានចំណាយពេលវេលាដ៏មានតម្លៃ អញ្ជើញចុះតាមដាន និងឈ្វេងយល់អំពីសកម្មភាពការងារ និងការអភិវឌ្ឍនានាក្នុងខេត្តបន្ទាយមានជ័យ។ ហើយតាមរយៈបេសកកម្មនេះ ស្តែងចេញឲ្យឃើញពីការយកចិត្តទុក្ខដាក់របស់ថ្នាក់ដឹកនាំ សមាជិក សមាជិកាព្រឹទ្ធសភា ក្នុងការខិតខំតាក់តែងសេចក្តីព្រាងច្បាប់ សេចក្តីស្នើច្បាប់ ឲ្យស្របតាមការប្រឈមនានា ដែលតែងតែជួបប្រទះនៅថ្នាក់មូលដ្ឋាន។
ជាមួយគ្នានោះដែរ ឯកឧត្តម អភិបាលរងខេត្ត ក៏បានជម្រាបអំពីស្ថានភាពភូមិសាស្ត្រខេត្តបន្ទាយមានជ័យ ដែលមានព្រំប្រទល់ជាប់នឹងប្រទេសថៃប្រវែង១៥៣.១៦០គីឡូម៉ែត្រ ក្នុងនោះមាន៤ស្រុក គឺស្រុកម៉ាល័យ ស្រុកថ្មពួក ស្រុកស្វាយចេក និងក្រុងប៉ោយប៉ែត។ ខេត្តបន្ទាយមានជ័យតែងតែជួបប្រទះនូវគ្រោះ ធម្មជាតិដូចជា៖ គ្រោះទឹកជំនន់ និងគ្រោះរាំងស្ងួតជាដើម កក្តាទាំងនេះដែលនាំឲ្យប្រជាពលរដ្ឋធ្វើចំណាកស្រុកទៅរកការងារធ្វើនៅក្រៅប្រទេស ជាពិសេសប្រទេសថៃ។
ឯកឧត្តមបានមានប្រសាសន៍បន្តថា ការធ្វើចំណាកស្រុកទាំងគ្រប់ទិសនៃប្រទេសកម្ពុជា រួមទាំងប្រជាពលរដ្ឋក្នុងខេត្ត បើគិតត្រឹមខែសីហា ឆ្នាំ២០១២នេះ មានប្រជាពលរដ្ឋធ្វើចំណាកស្រុកទៅរកការងារធ្វើ ដោយខុសច្បាប់នៅប្រទេសថៃប្រមាណជាង៤សែននាក់។ ប៉ុន្តែដោយមានការសហការយ៉ាងសកម្មរវាងអាជ្ញាធរខេត្តជាមួយនឹងអាជ្ញាធរខេត្តស្រះកែវនៃប្រទេសថៃ បានបញ្ជូនប្រជាពលរដ្ឋទាំងនោះមកប្រទេសកម្ពុជាវិញមានចំនួន១២២០ជើង មានប្រជាពលរដ្ឋសរុបចំនួន៦៨.៨៩៣នាក់ ក្នុងនោះស្រីចំនួន២០.៣៤៧នាក់ ប្រុសចំនួន៤១.៩៣៥នាក់ និងកុមារចំនួន៦.៦៦១នាក់។
ឯកឧត្តម អភិបាលរងខេត្តបន្ទាយមានជ័យ ក៏បានមានប្រសាសន៍បន្តទៀតថា ចំពោះការទប់ ស្កាត់ការជួញដូមនុស្ស និងការជួញដូផ្លូវភេទ បើគិតត្រឹមខែសីហា ឆ្នាំ២០១២នេះ ខេត្តបានធ្វើការទប់ស្កាត់បានចំនួន៤៥ករណី បើធៀបនឹងឆ្នាំ២០១១ មានការថយចុះចំនួន៣៥ករណី៕ អត្ថបទ និងរូបភាពនាយកដ្ឋានព័ត៌មាន
អត្ថបទពាក់ព័ន្ធ
