នាថ្ងៃសៅរិ៍ ទី០៩ ខែកក្កដា ឆ្នាំ២០២២ ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា, អនុប្រធានគណៈកម្មាធិការអចិន្រ្តៃយ៍ នៃក្រុមសភាជាតិកម្ពុជា-APF និងជាប្រធានគណៈប្រតិភូនៃក្រុមសភាជាតិកម្ពុជា-APF បានដឹកនាំគណៈប្រតិភូបន្តចូលរួមមហាសន្និបាតលើកទី៤៧ នៃសភា ប្រើភាសាបារាំង នៅ Centre de Convention ទីក្រុងហ្គីហ្គាលី ប្រទេសរ៉វ៉ាន់ដា ក្រោម អធិបតីភាព ឯកឧត្តម Francis Drouin ប្រធាន APF និងជាតំណាងរាស្រ្តកាណាដា ដោយមានវត្តមានដ៏ខ្ពង់ខ្ពស់របស់ លោកជំទាវ Louise Mushikiwabo អគ្គលេខាធិការនៃអង្គការអន្តរជាតិប្រើភាសាបារាំង។
ដំណើរការបន្តប្រព្រឹត្តទៅរបស់អង្គមហាសន្និបាតមានដូចតទៅ៖ – បទបង្ហាញរបស់ ឯកឧត្តម Augustin Iyamuremye ប្រធានព្រឹទ្ធសភារ៉វ៉ាន់ដា ស្តីពីកិច្ចដំណើរការភាពធន់ធ្វើឱ្យមានការផ្លាស់ប្តូរសង្គម-សេដ្ឋកិច្ច នៅប្រទេសរ៉វ៉ាន់ដា។ – សុន្ទរកថារបស់ លោកជំទាវ Louise Mushikiwabo អគ្គលេខាធិការអង្គការអន្តរជាតិប្រើភាសាបារាំង រួមទាំងការចោទសំណួរ និងការឆ្លើយតប។ – ពិភាក្សា និងបោះឆ្នោតអនុម័តនូវសេចក្តីព្រាងសេចក្តីសម្រេចចិត្តស្នើដោយគណៈកម្មការទាំង៤ (គណៈកម្មការនយោបាយ, គណៈកម្មការកិច្ចការសភា, គណៈកម្មការកិច្ចសហប្រតិបត្តិការ និងអភិវឌ្ឍន៍ និងគណៈកម្មការអប់រំ ទំនាក់ទំនង និងកិច្ចការវប្បធម៌) និងបណ្តាញសមាជិកសភា២ (បណ្តាស្រ្តីសមាជិកសភាប្រើភាសាបារាំង និងបណ្តាញសមាជិកសភាវ័យក្មេង)។ – បោះឆ្នោតជ្រើសតាំងសមាសភាពនៅក្នុងរចនាសម្ព័ន្ធ-APF។ – ចំពោះកាលបរិច្ឆេទ និងទីកន្លែងសម្រាប់មហាសន្និបាតលើកទី៤៨ មិនទាន់មានក្រុមសភាជាតិណាមួយទទួលយកនៅឡើយទេ។ រីឯកិច្ចប្រជុំគណៈកម្មាធិការអចិន្រ្តៃយ៍នឹងប្រព្រឹត្តទៅនៅថ្ងៃទី៣០ ខែមករា ឆ្នាំ២០២៣ នៅប៉ូលេនេស៊ី បារាំង។ – ចំពោះមហាសន្និបាតលើកទី៤៩ នឹងប្រព្រឹត្តទៅនៅប្រទេសកាណាដា។
