កាលពីរសៀលថ្ងៃទី០៤ ខែមេសា ឆ្នាំ២០១៣ គណៈប្រតិភូគណៈកម្មការសេដ្ឋកិច្ច ហិរញ្ញវត្ថុ ធនាគារ និង​សវនកម្ម ហៅកាត់គណៈកម្មការទី២ព្រឹទ្ធសភា ដឹកនាំដោយឯកឧត្តម ជា ជេដ្ឋ ប្រធានគណៈកម្មការ បាន​អញ្ជើញជួបពិភាក្សាការងារជាមួយនឹងឯកឧត្តម ប៉ិច សុខិន អភិបាលនៃគណៈអភិបាលខេត្តឧត្តរមានជ័យ ដើម្បី​ឈ្វេងយល់អំពីការអនុវត្ត និងត្រួតពិនិត្យថវិកា​ថ្នាក់ក្រោម​ជាតិ ក្នុងបរិបទវិមជ្ឈការ និងវិសហមជ្ឈការ នៅ​សាលប្រជុំសាលាខេត្តឧត្តរមានជ័យ ដោយមានការអញ្ជើញចូលរួមពីប្រធានមន្ទីរ​ពាក់ព័ន្ធនានាក្នុង​ខេត្ត​ឧត្តរមានជ័យ។

ឯកឧត្តម ប៉ិច សុខិន អភិបាលនៃគណៈអភិបាលខេត្តឧត្តរមានជ័យ បានមានប្រសាសន៍ ស្វាគមន៍យ៉ាងកក់ក្តៅ​ចំពោះគណៈប្រតិភូព្រឹទ្ធសភា ដែលបានចំណាយពេលវេលាដ៏មានតម្លៃ ចុះ ពិនិត្យការអនុវត្ត និងត្រួត​ពិនិត្យ​ថវិកា​ថ្នាក់ក្រោម​ជាតិ ក្នុងបរិបទវិមជ្ឈការ និងវិសហមជ្ឈការ ព្រម ទាំងការអភិវឌ្ឍនានា​របស់ខេត្ត​ឧត្តរមានជ័យ​នាពេលនេះ។
ឯកឧត្តម អភិបាលនៃគណៈអភិបាលខេត្តឧត្តរមានជ័យ បានមានប្រសាសន៍បន្តថា បើទោះបីជាខេត្តនូវមាន​ការជួបប្រទះបញ្ហាប្រឈមមួយចំនួនក៏ដោយ ក៏ថ្នាក់ដឹកនាំខេត្ត នៅតែបន្តការខិតខំយកចិត្តទុកដាក់ពង្រឹង និង​អនុវត្តន៍នូវរាល់ភារកិច្ចទាំងឡាយ ដើម្បីចូលរួមកសាងខេត្ត និងប្រទេសឲ្យកាន់តែមានភាពរីកចម្រើន​ទៅមុខ​ជា​លំដាប់។
ឯកឧត្តម ជា ជេដ្ឋ ប្រធានគណៈកម្មការទី២ព្រឹទ្ធសភា បានមានប្រសាសន៍ពាំនាំនូវការផ្តាំផ្ញើ​សាកសួរសុខ​ទុក្ខ​ពីសំណាក់សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ឯកឧត្តម សាយ ឈុំ អនុប្រធានទី១​ព្រឹទ្ធសភា ឯកឧត្តម ទេព ងន អនុប្រធានទី២ព្រឹទ្ធសភា និង ថ្នាក់ដឹកនាំព្រឹទ្ធសភាទាំងអស់។
ឯកឧត្តម ប្រធានគណៈកម្មការទី២ព្រឹទ្ធសភា បានមានប្រសាសន៍បញ្ជាក់អំពីតួនាទី និងសមត្ថកិច្ចរបស់​គណៈកម្មការទី២ព្រឹទ្ធសភា និងតួនាទីភារកិច្ចរបស់ព្រឹទ្ធសភា ព្រមទាំងមុខងារសំខាន់ទាំង៣របស់ព្រឹទ្ធសភាគឺ៖ ទី១-មុខងារនីតិកម្ម ទី២-មុខងារត្រួតពិនិត្យ និងទី៣-មុខងារជាតំណាង។
ឯកឧត្តម ប្រធានគណៈកម្មការទី២ព្រឹទ្ធសភា បានមានប្រសាសន៍បញ្ជាក់អំពីគោលបំណងនៃជំនួបពិភាក្សាគឺ ដើម្បីឈ្វេងយល់ឲ្យកាន់តែស៊ីជម្រៅបន្ថែមទៀតលើបញ្ហាមួយចំនួនដូចជា៖ ការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ ការអនុវត្តលទ្ធិប្រ ជាធិបតេយ្យនៅថ្នាក់​ក្រោមជាតិ ដោយផ្តោតលើការអនុវត្តច្បាប់ស្តីពីការគ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌ និងច្បាប់ស្តីពីការគ្រប់គ្រងរដ្ឋបាលឃុំ-សង្កាត់  ការអនុវត្តក្របខណ្ឌច្បាប់ និងលិខិតបទដ្ឋានច្បាប់ស្តីពីការផ្ទេរ​អំណាចពីថ្នាក់កណ្តាល និងការធ្វើប្រតិភូកម្ម​អំណាចមកថ្នាក់ក្រោមជាតិ ដើម្បីប្រមូលចំណូល និងការរៀបចំ​ថវិកា ការអនុវត្តច្បាប់​ស្តីពី​របប​ហិរញ្ញវត្ថុ និងការគ្រប់គ្រងទ្រព្យសម្បត្តិរបស់​ថ្នាក់ក្រោមជាតិ និងច្បាប់ស្តីពី​ហិរញ្ញវត្ថុ​សម្រាប់​ការ​គ្រប់គ្រងប្រចាំឆ្នាំ២០១២  ការអនុវត្តគម្រោងអភិវឌ្ឍ និងការចូលរួមពីអង្គការ​មិនមែន​រដ្ឋាភិបាល និងសង្គមស៊ីវិលនានា ក្នុងភាពជាដៃគូរ​ជា​មួយ​នឹងរាជរដ្ឋាភិបាល ក្នុងការចូលរួមអភិវឌ្ឍនៅថ្នាក់ ក្រោមជាតិ និងលើកស្ទួយជីវភាព​របស់ប្រជា​ពល​រដ្ឋ។
ឯកឧត្តម ប្រធានគណៈកម្មការទី២ព្រឹទ្ធសភា ក៏បានមានប្រសាសន៍វាយតម្លៃខ្ពស់ចំពោះ ការយកចិត្តទុក្ខដាក់​ខិតខំរបស់ថ្នាក់ដឹកនាំខេត្ត ដែលធ្វើឲ្យខេត្តមានការរីកចម្រើនលើគ្រប់វិស័យ ជាពិសេសការប្រមូលចំណូល​គ្រប់ប្រភេទ ការអនុវត្តគោលនយោបាយវិមជ្ឈការ វិសហមជ្ឈការនៅថ្នាក់មូលដ្ឋាន និងការធ្វើផែនការ​សមាហរណកម្ម ដោយមានភាពរលូន និងទទួលបានលទ្ធផលយ៉ាងល្អប្រសើរពីមួយឆ្នាំទៅមួយឆ្នាំ។
ឯកឧត្តម ប្រធានគណៈកម្មការទី២ព្រឹទ្ធសភា ក៏បានវាយតម្លៃខ្ពស់ចំពោះការចូលរួមយ៉ាងសកម្ម និងកិច្ច​សហប្រតិបត្តិការរវាងថ្នាក់ដឹកនាំខេត្តជាមួយនឹងអង្គការមិនមែនរដ្ឋាភិបាល និងសង្គមស៊ីវិលនានា ដោយបាន​ដាក់ចេញនូវគោលនយោបាយច្បាស់លាស់ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ និងអភិវឌ្ឍ​ហេដ្ឋា​រចនាសម្ព័ន្ធរូបវន្ត និងអរូបវន្តទូទាំងខេត្ត។
ឯកឧត្តម ប្រធានគណៈកម្មការទី២ព្រឹទ្ធសភា បានមានប្រសាសន៍បន្ថែមថា រាល់បញ្ហាប្រឈម និងសំណូមពរ​ដែលអាជ្ញាធរខេត្ត និងមន្ទីរជុំវិញខេត្ត បានលើកឡើង គណៈប្រតិភូនឹងរៀបចំធ្វើជារបាយការណ៍ ដើម្បី​រាយការណ៍ជូនដល់គណៈកម្មាធិការអចិន្រ្តៃយ៍ព្រឹទ្ធសភា និងផ្តល់អនុសាសន៍ជូនដល់ក្រសួង ស្ថាប័ន និង​អង្គភាពពាក់ព័ន្ធនានា ដើម្បីជួយកែលម្អនូវចំណុចខ្វះ​ខាត និងជួយសម្រួលដល់ការលំបាកដែលអាជ្ញាធរខេត្ត​បានជួបប្រទះ៕