ក្នុងឱកាសពិធីបុណ្យកាន់បិណ្ឌវេនទី៩ នាព្រឹកថ្ងៃទី១៩ ខែកញ្ញា ឆ្នាំ២០២២ គណៈកម្មការទី៥ព្រឹទ្ធសភា និងក្រុមសមាជិកាព្រឹទ្ធសភា ដឹកនាំដោយលោកជំទាវកិត្តិនីតិកោសលបណ្ឌិត ទី បូរ៉ាស៊ី ប្រធានគណៈកម្មការទី៥ព្រឹទ្ធសភា បានអញ្ជើញប្រារព្ធពិធីនមស្សកា បង្សុកូល វេរទេយ្យទាន និងទេយ្យវត្ថុប្រគេនព្រះសង្ឃ នៅវត្តមុនីប្រសិទ្ធីវង្ស ស្ថិតក្នុងខណ្ឌព្រែកព្នៅ រាជធានីភ្នំពេញ ដើម្បីឧទ្ទិសកុសលផលបុណ្យ ដែលកើតពីសទ្ធាជ្រះថ្លាទាំងនេះ ជូនចំពោះញាតិការទាំងប្រាំពីរសន្តាន ឥស្សរជន និងយុទ្ធជន ដែលបានពលីជីវិត ដើម្បីជាតិមាតុភូមិ ជាពិសេសដល់ដួងវិញាណក្ខន្ធសម្តេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជា ស៊ីម សម្តេច ស៊ីសុវត្ថិជីវ័នមុនីរ័ក្ស និងឯកឧត្តម នៃ ប៉េណា ដែលបានទទួលមរណកាលទៅកាន់លោកខាងមុខទៅហើយនោះ សូមឱ្យជួបប្រកបតែវិបុលសុខគ្រប់ប្រការ និងទៅកាន់សុខគតិភពកុំបីឃ្លៀងឃ្លាតឡើយ។
ទេយ្យទាន និងទេយ្យវត្ថុ ដែលនាំមកប្រគេនព្រះសង្ឃ នាពេលនេះ រួមមាន៖ អង្ករ២បាវ ត្រីខ១កេស ទឹកដោះគោខាប់១កេស មីជាតិ២កេសធំ ត្រីងៀត៥គីឡូ ទឹកសុទ្ធ៥កេស ទឹកក្រូច៥កេស និងតែស្ករ នំខ្មែរ ផ្លែឈើ ព្រមទាំងចង្ហាន់ និងបច្ច័យមួយចំនួនធំផងដែរ។