នាព្រឹកថ្ងៃទី១៧ ខែមករា ឆ្នាំ២០២២ ឯកឧត្ដម ឈើយ ចាន់ណា លេខាធិការគណៈកម្មការទី៧ និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ រួមជាមួយលោក លឿង សុភក្តិ អភិបាលស្រុក លោក ដា ទឹង ប្រធានក្រុមប្រឹក្សាស្រុក លោក រ៉ែម វីរៈ ស្នងការរងខេត្ត បានអញ្ជើញជាអធិបតីក្នុងកម្មវិធីសុំម្ចាស់ទឹកម្ចាស់ដីសាងសង់អគារសិក្សា ១ខ្នង ៥បន្ទប់ ធ្វើអំពីថ្ម ប្រក់ក្បឿង ស្ថិតនៅអនុវិទ្យាល័យទ្រាស់ ឃុំទ្រាស់ ស្រុកស្វាយចេក ខេត្តបន្ទាយមានជ័យ។ អគារសិក្សា១ខ្នង ត្រូវបានរៀបចំសាងសង់នេះកើតឡើងពីការរួបរួមសាមគ្គីគ្នារបស់សប្បុរសជន ដែលបានចូលរួមមានចំនួនជាង១០០នាក់ បានទឹកបាក់ជាង១ម៉ឺនដុល្លារអាមេរិក។ ជាមួយនេះ ឯកឧត្ដម បានចូលរូមស៊ីម៉ងត៍ ចំនួន៥តោន លោក លឿង សុភក្តិ ស៊ីម៉ងត៍ ចំនួន១០តោនផងដែរ។ ក្នុងពិធីនេះ ឯកឧត្ដម បានថ្លែងនូវការសួរសុខទុក្ខ និងកោតសសើរដល់លោកនាយក លោកគ្រូ អ្នកគ្រូ ក្មួយៗ សិស្សានុសិស្ស និងអាជ្ញាធរគ្រប់លំដាប់ថ្នាក់នៅមូលដ្ឋាន ដែលបានខិតខំប្រឹងប្រែងក្នុងកិច្ចការអភិវឌ្ឍ ទាំងជំនាញទន់ និងរឹង ដើម្បីជាប្រយោជន៍ដល់មូលដ្ឋាន និងសង្គមជាតិ។ បានរំលឹកថា កាលពីថ្ងៃទី២០ ខែកុម្ភៈ ឆ្នាំ២០២១ ជំងឺកូវីដ-១៩ បានឆ្លងចូលសហគមន៍ ធ្វើឱ្យប្រជាជនទូទាំងប្រទេសជួបបញ្ហាជាច្រើន ពិសេសបញ្ហាសេដ្ឋកិច្ច និងជីវភាពគ្រួសារ។ រាជរដ្ឋាភិបាល បានខិតខំរិះរកគ្រប់មធ្យោបាយក្នុងការស្វែងរកវ៉ាក់សាំង ដើម្បីចាក់ជូនប្រជាជនឥតគិតថ្លៃ ដូចនេះ យើងទាំងអស់់គ្នាត្រូវគោរពឱ្យបាននូវវិធានការ ៣ការពារ និង៣កុំ ដើម្បីកុំឱ្យជំងឺដ៏កាចសាហាវនេះឆ្លងចូលក្នុងសហគមន៍មូលដ្ឋានយើងទៀត។
